Bu dəfəki veb layihəmiz, dünyanın №1 çap avadanlıqları istehsalçısı Roland DG-nin Azərbaycandakı rəsmi tərəfdaşı olan MC Union şirkətinə məxsusdur. Strategiya mərhələsində apardığımız analiz göstərdi ki, şirkət əsasən iri formatlı çap avadanlıqlarının satışına fokuslanır və B2B metodunu üstün tutur. Lakin portfelində həmçinin mobil aksesuar örtükləri və digər kiçik məhsullar üzərinə birbaşa çap imkanı təqdim edən avadanlıqlar da mövcuddur. Şirkət bu kateqoriyalara prioritet verməsə də, araşdırmalarımız göstərdi ki, öz şəxsi biznesini qurmaq istəyən və müəyyən maliyyə resursuna sahib olan alıcılar məhz bu məhsullara ciddi maraq göstərirlər.

Bu nəticələrdən çıxış edərək, saytın kontent strategiyasını iki istiqamətə bölərək hazırladıq: iri bizneslər üçün geniş çap avadanlıqları haqqında ətraflı məlumat, həmçinin kiçik sahibkarlar üçün “Xəyallarınızdakı tətbiq üçün fürsətləri önünüzə səririk” şüarı altında tətbiq nümunələri və vizual materiallarla diqqəti cəlb edən yanaşma.